الشمس غابت
هذه القصيدة في رثاء الوالد الحاج / عبد الباقي الحلبي
الشمس غابت
النهاردا الشمس غابت
ليه ما طلعتش ف معادها ؟
تعبت أنادى ما استجابت ..
ولا .. دلت ع اللي خدها
يا طول نهاري
أصبر الحيران و أدارى
وأما طِلعِت ع العصارى
جت وهيا مستحية
جت وهيا ملفلفة بحبه دفا
وحبال مسدها
ملتحفة بتواب حِدادها
******
والقمر حالف ما يمشي
كأنه على بابنا أسير
و الضي شارد ع البلاد
زى طير تايه وحيد
جوا دوامة سواد
طاير ومكسور الجناح
حاير و بيدور يا عيني
عللي فاته ف يوم وراح
هوا فيه إيه النهاردا ؟ !
وكل دا ( يا مايا ) بـ يجرا
والورود ملهاش عبير
و الشوك منبت ع الحرير
لا عتابنا فيه ..
ولا لوم عليه
هيا العلامة قربت
ولا القيامة اليوم وليه ؟!
ولا دا علشان ما أبويا ..
الحاج راقد شويتينو
ع السرير .. ؟ !
فارد جبينه .. يا حب عيني
بيتلو ف العشر الأخير
******
الله عليك .. و عنيك
بسبلها الملاك
يا حبنا .. وقلبي الكبير
و الوجه كيف البدر نور
و ابتسامتك لسه باردو
هيا هيا مزهزهه
و بتقرا سورة ( الزلزلة )
بتعزها .. وعشان كدا
بقت الجدر تتهز لك
******
( أيوب – يا بويا ) ..
اشتقت لك
و أنا اللي جي لك من بعيد
كأن قلبي .. اليوم مريض
بنصف شريان و أنجرح ..
و كام كدا حبه وريد
تسأله .. ولا أسألك ؟ !
حاسس يا ( بويا )
إنك أنت ..
راح تسيبنا اليوم أكيد
وها تفارقنا للأبد
ما هي كل حاجة ..
حلوة فينا ..
يا حبيبي .. بتناديك
( ندي .. و إيمان ) ..
حتى الحيطان ويا الغيطان
والقبلة بتشاور عليك
حتى الآذان ساعة العِشا
يا حب عيني بودعك
لا .. و بواسيك
جايب حريره وتوب ملس
و أما إبتدا ..
( الله أكبر .. )
كنت بتسبل عنيك
والنفس من غير نفس
و الأيدين فوق الأيدين
متلفلفين ..
الشِمال فوقها اليمين
و أما انتهى ( يابا ) الآذان ..
أخد أمانتك للسما
ورحت من بينا ف ثوان
ولا فت لينا .. يا نور عِنينا
غيرش قلب ملان دموع
قلب موجوع بالفراق
مِستني علي أمل الرجوع
لكنهم فردوا الملايه
يا حبيب القلب ( يابا )
غصب عني .. ياحته مني
و أما سألت علي الخبر .. ؟ !
كان كل واحد .. في اللي
واقفين انفجر ..
ولا حد جاوب ع السؤال !
بقت الدموع زى المطر
بتقطع القلب الحزين
وتهد في قلب الحجر
********
الوداع .. يا حبيب ( ياسين
وهود وطه والقمر ..
وص وغافر وسبأ
والقيامة .. وفصلت
وق وفاطر والنبأ )
الوداع .. يا أبو الغلابة الطيبين
سبع سنين .. قلبك صبر
لا جزعت فيها .. ولا ضجر
وأسأل ( ظفر )
رغم المرض .. رغم الخطر
كانت عنيك متعلقة ..
برب البشر !
الوداع يا حبيبنا ..
يا حبيب الملايين
الوداع يا قلبنا
( الفاتحة ) ليك ..
وصلاتي فيك
يا ظل محرابي أنا ..
فاكرك هِنا .. جوا هِنا ..
يا نور عِنينا وضينا
ولا لحظة واحدة ..
أنساك ( يا بويا ) وربِنا
لو حتى فات .. مليون سنه
ابنك / عادل الحلبيالمصدر: منتديات برامج العاب افلام صورhgals yhfj
رد مع اقتباس
المشاركة الأصلية كتبت بواسطة عادل الحلبي
مواقع النشر (المفضلة)